YANGA KUWAKILISHA TAIFA MICHUANO YA SHIRIKISHO CAF!

Baada ya kutolewa katika michuano ya ligi ya Klabu Bingwa ya CAF na Klabu ya Zesco ya Zambia kwa bao 3- 2,  Wawakilishi pekee wa Taifa Klabu ya Yanga sasa itatupa karata yake katika michuano ya Shirikisho ya CAF!

Katika mtanange  mkali uliofanyika leo mjini Ndola Zambia, Zesco walitangulia kwa kuweka kimiani bao la kwanza mnamo dakika ya 25 lililopachikwa na mshambuliaji wao Jesser Were! Hata hivyo Yanga walijibu mapigo kwa kusawazisha mnamo dakika ya 31 kwa bao lililowekwa kambani na Sadney Urikhob.
Baada ya mapumziko Zesco walilisakama sana lango la Yanga. Kutokana na shinikizo hilo mlinzi Abdulaziz Makame wa Yanga akajikuta anausukuma mwenyewe  nyavuni mpira baadala ya kuokoa krosi iliyopigwa na mshambuliaji mahiri wa Zesco. Katika mchezo wa awali uliochezwa Dar timu hizo zilitoka sare kwa kufungana bao 1-1!